DKT.MPANGO ATEMBELEA BANDA LA BENKI YA TADB KATIKA MAONESHO YA NANENANE DODOMA

bmtvtanzania January 7, 2025

DKT.MPANGO ATEMBELEA BANDA LA BENKI YA TADB KATIKA MAONESHO YA NANENANE DODOMA

Uncategorized
August 1, 2025
No Comment
42

10 / 100

SEO Score

Makamu wa Rais wa Jamhuri ya Muungano wa Tanzania Mhe. Dkt. Philip Mpango akisikiliza maelezo kutoka kwa Mkurugenzi Mtendaji wa Benki ya Maendeleo ya Kilimo (TADB) Frank Nyabundege kuhusu miradi mbalimbali inayofadhiliwa na Benki hiyo wakati Makamu wa Rais akikagua mabanda ya maonesho katika ufunguzi wa maonesho ya Nanenane Kitaifa yanayofanyika Viwanja vya Nzuguni Jijini Dodoma.

…..

Makamu wa Rais wa Jamhuri ya Muungano wa Tanzania, Mhe. Dkt. Philip Mpango, ameziagiza Wizara ya Kilimo na Wizara ya Mifugo na Uvuvi kuhakikisha vijana walioweza kujiajiri kupitia sekta ya kilimo na uvuvi wanatangazwa kikamilifu kwenye vyombo mbalimbali vya habari ili wawe ushuhuda kwa vijana wengine nchini.

Dkt. Mpango ametoa agizo hilo leo Agosti 1, 2025 jijini Dodoma, wakati akitembelea Banda la Benki ya Maendeleo ya Kilimo katika maonesho ya wakulima (Nanenane) ambapo alipata nafasi ya kusikiliza ushuhuda wa vijana wanaojishughulisha na ufugaji wa samaki kwa kutumia vizimba.

Makamu wa Rais amepongeza kikundi cha vijana tisa kutoka Mwanza kiitwacho Vijana Nguvu Kazi kwa ubunifu na juhudi zao katika kujiajiri kupitia ufugaji wa samaki. Vijana hao waliweza kukopeshwa na Benki ya Maendeleo ya Kilimo ili kuendeleza shughuli zao kwa kutumia teknolojia ya vizimba.

“Hawa vijana nataka niwaone kwenye vyombo vya habari mara kwa mara, kwa sababu kuna vijana wengi mtaani wanalalamikia ajira. Watumieni hawa, watakuwa walimu wazuri kwa wenzao waingie kwenye sekta ya ufugaji wa samaki na hivyo kuondokana na umaskini,” amesema Dkt. Mpango.

Aidha, Dkt. Mpango ameitaka Wizara ya Mifugo na Uvuvi kuendelea kuwawezesha vijana kama hao kwa kuwapatia mitaji mikubwa zaidi ili waweze kufikia masoko ya kimataifa na kuongeza thamani ya mazao yao ya samaki kwa kuyachakata.

Amezitaka pia benki nyingine zilizoshiriki kwenye maonesho hayo kusaidia kuwapatia mikopo yenye masharti nafuu vijana waliothubutu kuingia kwenye kilimo na uvuvi wa kisasa, ili waweze kukuza biashara zao na kuongeza ajira kwa Watanzania wengine.

Dkt. Mpango amesisitiza kuwa vijana kama hao wanapaswa kupewa nafasi ya kuonekana na kusikika zaidi ili kubadilisha fikra hasi zinazowafanya baadhi ya vijana waone kuwa kilimo na uvuvi si ajira yenye tija.